Parimet për furnitorët
Në përputhje me Parimet e Përgjithshme të Biznesit të Shell dhe Kodin e Sjelljes të Grupit Shell, ne synojmë të punojmë me kontraktorë dhe furnitorë të cilët kontribuojnë në zhvillimin e qëndrueshëm dhe të cilët janë të përgjegjshëm në aspektin ekonomik, mjedisor dhe social.
Ne krijojmë dhe përforcojmë marrëdhënie me kontraktorë dhe furnitorë të cilët, në veprimtaritë e tyre dhe në menaxhimin e furnitorëve dhe nënkontraktorëve të tyre, zbatojnë parimet e përcaktuara në vijim ose standarde të ngjashme.
Kontraktorët dhe furnitorët duhet të sigurojnë një mekanizëm sinjalizimi të posaçëm për punonjësit e tyre, ku ata të mund të depozitojnë në mënyrë konfidenciale ankesat e tyre në lidhje me temat e mëposhtme.
1. Integriteti i biznesit
Kontraktorët dhe furnitorët veprojnë në përputhje me të gjitha ligjet dhe rregulloret e zbatueshme.
Kontraktorët dhe furnitorët nuk duhet të tolerojnë, të lejojnë apo të përfshihen në dhënie ryshfetesh, korrupsion ose praktika joetike.
Kontraktorët dhe Furnitorët mbështesin konkurencën e drejtë dhe shmangin konfliktet e interesit.
2. SHËNDETI, SIGURIA, MBROJTJA, MJEDISI (HSSE) DHE PERFORMANCA SOCIALE (SP)
Kontraktorët dhe furnitorët kanë një qasje sistematike ndaj menaxhimit të HSSE & SP, të konceptuar në mënyrë të tillë që të sigurohet pajtueshmëria me të gjitha ligjet e zbatueshme dhe të arrihet një përmirësim i vazhdueshëm i performancës.
Kontraktorët dhe furnitorët:
- janë të përkushtuar ndaj mbrojtjes së mjedisit në përputhje me të gjitha ligjet dhe rregullat e zbatueshme;
- përdorin me efikasitet energjinë dhe burimet natyrore;
- kërkojnë vazhdimisht mënyra për të minimizuar mbetjet, emetimet dhe shkarkimet nga operacionet, produktet dhe shërbimet e tyre;
- respektojnë fqinjët e tyre dhe kontribuojnë në shoqëritë në të cilat ata veprojnë;
- menaxhojnë me kujdes ndikimet sociale të veprimtarive të tyre dhe shtojnë përfitimet për komunitetet vendase;
- kuptojnë se dialogu dhe përfshirja e rregullt me grupet e interesit është me rëndësi thelbësore. Në marrëdhëniet tona me punonjësit, partnerët e biznesit dhe komunitetet vendase, ne përpiqemi t’i dëgjojmë ata dhe t’u përgjigjemi me sinqeritet dhe përgjegjshmëri.
3. TË DREJTAT E PUNËTORËVE DHE TË DREJTAT E NJERIUT
Kontraktorët dhe furnitorët ushtrojnë veprimtaritë e tyre duke respektuar të drejtat e njeriut të përcaktuara në Deklaratën Universale të të Drejtave të Njeriut të Organizatës së Kombeve të Bashkuara dhe konventat themelore të Organizatës Botërore të Punës, duke garantuar:
- ndalimin e punës së të miturve;
- ndalimin e punës me dhunë, robërisë dhe punës së detyruar;
- moslejimin e pagesës së tarifave të rekrutimit nga punonjësit;
- pajtueshmërinë me të gjitha ligjet dhe rregulloret e zbatueshme për lirinë e organizimit dhe lirinë sindikale;
- një mjedis pune të sigurt, të mbrojtur e të shëndetshëm dhe mostolerimin e diskriminimit, ngacmimit apo hakmarrjes;
- pajtueshmërinë me të gjitha ligjet dhe rregulloret e zbatueshme për orarin e punës;
- dhënien e pagave ose përfitimeve që përmbushin ose tejkalojnë standardet ligjore kombëtare.
